Fratman 'gipatay' sa tanod

CEBU, Philippines - Patay diha-diha ang usa ka traysikad drayber nga gikatahong sakop sa Alpha Kappa Rho fratertnity nga mitambong og disco human napusilan sa usa ka barangay tanod sa barangay Punta Princesa pasado alas 5 kagahapon sa buntag. Si Dennis Amarado,29, taga Doña Maria Extention barangay Punta Princesa namatay human maigo sa ubos nga bahin sa lawas, apan walay nakatumbok sa pangalan sa maong tanod nga giingong mipusil kaniya.

Usa ka 15-anyos nga dalagita maoy mitumbok nga tanod maoy nagpusil kang Amarado atol sa kagubot sulod sa maong diskohan nga pahinungod sa ilang kapistahan.

Sa imbestigasyon sa kapolisan, giingong dunay nahitabong karambola sulod sa diskohan hinungdan nga nanulod ang mga nagbantay nga tanod aron buwagon ang duha ka grupong nanag-away.

Apan giingong milaban si Amarado sa iyang mga kauban ug gikomprontase ang tanod, sa kalit lang usa ka sipang buto sa armas ang nadungog ug nahagba ang biktima hinungdan nga nagkatibulaag ang mga tawo.

Gidali pagdala sa Cebu City Medical Center si Amarado apan namatay gyud kini, dihang giadto sa mga polis ang tambalanan wala na sad diha ang mga tanod nga naghatud sa biktima lakip na ang tanod nga gidudahang maoy mipatay kang Amarado.

Si Barangay Captain Rodolfo Diorio sa barangay Punta Princesa sa pakighinabi sa Banat News nagkanayon nga dili pa siya maka-ingon nga kini barangay tanod tungod kay nag-imbestigar pa sila ug mihimakak usab nga dunay mga armas ang iyang mga tanod.

Nasayran usab gikan kang PO2 Crescente Dasillo sa Punta Princesa Police station sa pakighinabi sa Banat News nga nagsulod-gawas na ang biktima sa prisohan tungod sa mga kasong pagpangawat.

Ang Cebu City Police Office Homicide Section nagpahigayon pa sa halawom nga imbestigasyon kabahin sa pagpusil-patay sa biktima ug pag-ila sa giingong tanod nga suspek. - Lesley Caminade (BANAT NEWS)