'Masiao coordinator' gironda sa PIB arestado

CEBU, Philippines – Naka-iskor na usab ang mga sakop sa Provincial Intelligence Branch (PIB) human makasikop sa usa ka giingong masiao coordinator nga bana sa usa ka barangay konsehal kagahapon sa alas 6:15 sa buntag sa barangay Looc, lungsod sa Dumanjog.

Apan nakugang ang kapolisan gumikan kay gisukmatan sila dayon sa suspek nganong gidakop siya nga naghatagan man sila og protection money sa PIB.

Ang nadakpan giila sa kapulisan nga si Precillo Efhan Jr. “alias Junjun,” bana sa kagawad sa ilang barangay sa nahisgutang lugar pinasikad sa search warrant nga giisyu ni Judge Eric Menchavez sa Regional Trial Court Judge branch 21 nga gipetsahan og Mayo 13 ning buwana.

Ang maong pagpang-ronda gipanguluhan mismo ni Chief Insp. Elma Delos Santos ang hepe sa PIB ug nakasakmit og usa ka bundle nga tally sheets nga adunay mga number combination, lima ka ballpen, usa ka calculator, usa ka fax machine ug cash nga P1,450 nga gituohang halin sa illegal nga sugal.

Matud pa ni Delos Santos nga pipila ka adlaw silang nagsigi’g paniid sa akusadong si Efhan kini human magsigeg balhin-balhin og puyo’g balay saingon dili matiktikan sa kapulisan ug may nalang kay ilang naaktuhan kagahapon sa buntag didto sa ilang panimalay dihang nipauli ug nakuha ang mga ibedinsiya.

Sumala pa ni Delos Santos nga si Efhan taud-taud nang nabaniog may kalambigitan sa maong illegal nga sugal sukad pa niadtong 1995 ug tulo na ka mga financier ang nahimong amo niini.

Gani ang operation sa masiao nga gihuptan ni Efhan dili lang diha sa Dumanjog kun dili naabot na kini sa lungsod sa Barili, Ronda ug uban pang mga silinganang lungsod sa habagatang bahin sa probinsya sa Sugbu.

Subay niini gibutyag ni Delos Santos nga duna sila karoy gisubay nga usa ka tawong migamit sa pangalan sa PIB sa pagpangolekta’g protection money gikan sa mga gambling lords.

Kini human usab siya ug ang iyang mga kaubanan gisukmatan sa akusadong si Efhan kun nganong ilang gidakop nga matud pa niini nga naghatagan man siya sa PIB og P2 mil matag semana.

Hinungdan nga dali nilang gipaubos sa tactical interrogation ang akusadong si Efhan ug ilang nasuta nga usa ka civilian maoy migamit sa ilang pangalan sa pagpanghingi’g payola. Gihikay na hinuon sa mga sakop sa PIB ang tukmang kasong ipasaka batok sa akusado karong Lunes nga kalapasan sa RA. 9287 kon illegal gambling diin ang maong kaso dunay P100   nga piyansa. - Guam Logroño (BANAT NEWS)