Gikiha nakawata'g kwarta sa ATM

CEBU, Philippines – Gikiha na sa kapolisan ang usa ka tawong nangawat og kuwarta sa mga Automated Teller Machine (ATM).

Si Ryan Aniceto,25, lumad nga taga Dasmarinas, Cavite, nasikop sa usa ka security guard sa Ayala Cebu sa miaging buntag.

Si Dominador Rey, kinsa maoy nakadakop sa suspetsado nagkanayon nga dugay na nilang gipanid-an ang maong lalaki human maklaro nila ang dagway niini pinaagi sa surveillance camera nga may gimaniobra sa ATM.

Miingon si Rey nga gitaoran nila og camera ang duol,sa ATM station kay nagpunay na og reklamo ang taga UCPB kay ang kuwarta sa ilang mga kliyente sa ATM permi lang nawagtang, gani wala nay ma-withdraw ang uban.

Miingon si Rey nga dihang nasikop nila ang suspetsado, may gikupotan kining usa ka pinulbos nga puti sulod sa gamay’ng pakiteng plastic nga gituohan nilang shabu.

Samtang sa bahin usab ni Chief Inspector George Ylanan sa CCPO Investigation Detection Management Bureau (IDMB) nagkanayon nga kini pa maoy unang higayong nakasugat sila ning maong matang sa modus, busa kasong paglapas sa balaod bahin sa ginadiling drugas mao lang una ang ilang gipasaka batok sa suspek. – BANAT NEWS