Citom enforcer, towing nanam-ag ipa-imbestigar

CEBU, Philippines - Ipaubos sa imbestigasyon ang mga personnel sa One Stop Towing Services lakip na ang Citom personnel nga uban sa migukod sa duha ka tawong walay helmet sakay og motorsiklo niadtong miaging adlaw nga miresulta sa pagkaangol sa driver sa motorsiklo.

Kini maoy gipasalig ni Konsehal Raul “Yayoy” Alcoseba, ang chairman sa Committee on Traffic Management sa City Council dihang eksklusibong nahinabi sa Banat News.

Matud pa ni Alcoseba nga iyang tahasan si Citom Executive Director Arnel Tancinco pagsusi sa tinuod nga nahitabo ug pagduso og rekomendasyon sa iyang buhatan.

Wala mahimuot ang konsehal sa pasiunang taho nga iyang nakutlo nga gikulata pa ang drayber hangtud nakuyapan ug nalandig sa tambalanan.

Ang biktima naila nga usa ka Freddie Teopez, 32, nga maoy nagmaneho sa motorsiklo uban sa backrider niini nga si Jackson Cañete.

Gikataho nga samtang sakay ang duha sa motorsiklo kalit lang kining gigukod sa One Stop Towing Truck nga gipanguluhan sa usa ka Glencel Arnaiz.

Pag-abot sa Fuente Osmeña Rotunda giingong gidumbol sa truck ang gisakyan sa duha hinungdan nga natumba ang motorsiklo.

Diha-diha nanaog si Arnaiz ug gikatahong gipatid-patiran pa niini ang naangol nang daan nga si Teopez ug gikarga ang motorsiklo sa towing truck.

Daling gidala ang biktima ngadto sa duol nga tambalanan human makabiya ang towing truck nga giubanan sa Citom personnel nga giila lang sa apelyido nga Arriola.

Matud pa ni Alcoseba nga kinahanglang tubagon nilang Arnaiz ug Arriola ang ilang gihimo tungod kay dili apil sa ilang trabaho ang pagsilot ngadto sa mga malapason sa balaod sa trapiko.

“Kung dili ta matagbaw sa ilang pagpasabot, tangtangon nato ang Citom personnel nga wa kabadlong, ug i-revoke sab nato ang deputization sa towing truck personnel nga involved,” sumala ni Alcoseba.

Una nang gipadayag ni Tancinco nga ang towing truck dili tukma paggukod og mga sakyanan labaw nang wala itugot sa mga personnel niini ang pagpangulata sa ilang madakpan.

Ang Citom executive director nga tua pa sa kauluhan mipasalig nga dunay imbestigasyon nga himuon sa maong hitabo. - Elly Bolonos (BANAT NEWS)