Lalaki nag-amok gipatay sa FTP

CEBU, Philippines - Duha ang patay samtang tulo ang naangol, lakip ang usa ka Field Training Police, human maghuramentado ang usa ka lalaki sa gawas nga bahin sa merkado publiko sa dakbayan sa Lapulapu kagahapon sa buntag.

Napatay hinuon ang tawong nag-amok nga nailang si Jury Pialan Mateo, 36, taga barangay Balugo, lungsod sa Guihulngan, Negros Oriental human kini mapusili sa FTP nga si PO1 Alexander Solihon, 24.

Apan si PO1 Solihon nga miambak gikan sa mobile patrol vehicle aron pag-responde gisugat og dunggab ni Mateo hinungdan sa pagkaigo sa iyang tuo nga nawong ug nag-ungot pa ang kutsilyo sa iyang nawong sa dihang gidala sa Vicente Sotto Memorial Medical Center.

Sa dihang mibawos si PO1 Solihon ginamit ang iyang .45 kalibre nga pistola, naigo si Mateo sa iyang suwang ug milapos ang bala sa iyang baba. Dead on arrival kini sa Lapulapu District Hospital.

Sa imbestigasyon ni SPO1 Frederick Eslit sa Crime Against Person sa Lapulapu City Police Office, si Mateo kalit lang naghuramentado duol sa ukay-ukayan sa merkado.

Sumala pa sa report nga si Mateo kalit lang miduol sa tindahan ni Alfonso Frias, 58, lumad nga taga Bogo apan nanimuyo sa dalan Mangubat, Poblacion sa maong siyudad ug naninda og utanon sa merkado sa Lapulapu.

Giilog ni Mateo ang kutsilyo nga gihiwa unta sa mga utanon ni Frias ug giunay og dunggab ngadto sa dughan niini kinsa naabtan ug nakorner gyud atol sa iyang pagdagan. Si Frias namatay gyud human sa hitabo.

Nakit-an ni Mateo si Manuel Bugtai, 32, taga sitio Langub, barangay Poblacion, dakbayan sa Lapulapu nga nahiagi hinungdan nga kini na usab ang iyang giatubang ug gidunggab.

Laing nakit-an ni Mateo nga si Maria Veronza Marla, 26, nga silingan ni Bugtai, gidunggab usab niini samtang namalit og utanon.

Sa dihang nasayran ni PO1 Solihon, lumad nga taga Bohol, nga adunay nag-amok sa merkado diin siya nadestino isip FTP, miresponde siya sakay sa mobile patrol vehicle.

Sa paghiabot niini, milayat unta kini dayon sa sakyanan aron badlongon si Mateo. Apan gisugat ni Mateo si PO1 Solihon ug gikalitan og duslak sa dala niining kutsilyo ang nawong sa batan-ong polis.

Silang PO1 Solihon, Marla ug Bugtai nahidangat gyud sa tambalanan.

Hangtod sa pagsulat ning balita, wala masayri ang hinungdan nganong naghuramentado si Mateo. – BANAT NEWS