Budget para sa North Coastal Road adto ihatag sa Kapitolyo

CEBU, Philippines – Gikumpirmar ni Governor Gwendolyn Garcia ang report nga ang P359 milyones nga budget alang sa North Coastal Road ihatag ngadto sa kagamhanan probinsiya sa Sugbu ug dili sa Deparment of Public Works and Highways kon DPWH.

Si Garcia miingon nga si Presidente Gloria Macapagal Arroyo mimando niini human ang Sugbuanong Press Secretary nga si Cerge Remonde miisa sa maong isyu atol sa gipahigayong cabinet meeting atol sa pagbisita niini sa Sugbu niadtong adlaw nga Lunes.

Gipasabot sa gobernador nga nakasabot ang presidente sa katuyuan sa pagtugyan sa maong pundo ngadto sa kagamhanan sa probinsiya.

Ang katuyoan mao nga mas madali kining mahuman kay ang anhi nalang himuon ug ang panguhaong kontraktor ug materyales lakip na ang mga trabahante dinhi na usab kuhaon.

Kini maoy labing unang higayon nga gitugyan ngadto sa lokal nga kagamhanan ang usa ka national project. Mipasalig si Garcia nga himuon nila ang tanan aron makadayeg sa mga Sugbuanon ang presidente.

Ang gobernadora nagkanayon nga makigtagbo siya kang DPWH Secretary Hermogenes Ebdane aron sa pag-umol og Memorandum of Agreement alang sa katumanan sa maong proyekto.

Ang gobernador miingon nga maong north coastal road project dinhi gihapon himuon sa karaang dalan nga nagkonektar sa Consolacion paingon na sa Liloan apan ning maong proyektoha himuon kining four lanes imbes nga duha ka lanes apil na ang maagiang mga taytayan. - Chester Abadilla (BANAT NEWS)