Sidewalk vendors sa Bacalso Avenue gi-bulabog sa Speed

CEBU, Philippines – Nabulabog ang mga sidewalk vendors sa dalan N. Bacalso Avenue sa siyudad sa Sugbu sa dihang gikalitan og dasmag sa mga sakop sa Squatters Prevention Encroachment and Elimination Division (SPEED) kagahapon sa buntag.

Kapin sa 20 ka mga manindahay duol sa Elizabeth Mall lahos na ngadto sa South Bus Terminal ang gipangsakmitan sa ilang mga baligya atol sa clearing operation.

Matud sa hepe sa SPEED nga si Vicente Mercado nga mga gahi og ulo ang nahisgutang mga vendors ug dili maminaw sa ilang mga pasidaan.

Gani miingon si Mercado nga makapila na nila abuga ang maong mga manindahay tungod usab sa mga reklamo nga ilang nadawat.

Gitataw sa hepe sa SPEED nga ang mga pasahero mismo sa South Bus Terminal maoy nanawag sa ilang buhatan ug mipadangat sa reklamo.

“Daghan kaayo nga mga passenger ang manawag diri kay dili na lagi kuno sila makaagi sa sidewalk kay naay daghang naninda,” sumala ni Mercado.

Sa makausa pa mibahad ang hepe sa SPEED ngadto sa apektadong mga vendors nga dili nila lugakan ang maong dapit sa paghawan.

“Kun mamalik gani gihapon na sila diha, aw amo sab nga balikon paghawan kay mamalik man gyud na,” dugang ni Mercado. Sagad sa mga baligya sa mga sidewalk vendors diha sa nahisgutang dapit nga gipangsulod og hapag mao ang gitawag og mga “perishable goods.“

Kini sama sa mga prutas, biscuits, tubig ug uban pang mga baligya nga mahimong igasa (pasalubong) sa mga mouli ngadto sa probinsya.

Gitataw ni Mercado nga mabawi lang sa mga sidewalk vendors ang gipangsakmit nga mga baligya kun kini mobayad og multa.

Ang paghawan diha sa N. Bacalso Avenue maoy kabahin sa ipatuman sa SPEED nga demolition ug clearing operation niining buwana sa kinatibuk-ang dakbayan. - Elly Bolonos (BANAT NEWS)