Mga international vessel gi-estrikto sa Bureau of Quarantine - Labella

CEBU, Philippines – Estrikto na usab karung gimonitor sa Bureau of Quarantine ang tanang mga barko gikan sa lain laing kanasuran nga moabot sa pantalan dinhi sa Sugbo.

Kagahapong adlawa duha ka mga cargo vessels gikan sa nasud sa Malaysia ug Singapore ang gisusi lakip na mga tripulante niini sa mga tinugyanan sa Bureau of Quarantine human nidunggo kini sa Cebu Port Authority (CPA) kagahapon sa alas 10:00 pasado sa buntag.

Ang hepe sa Bureau of Quarantine dinhi sa Sugbo Dr. Emmanuel Labella maoy nangulo sa gihimong pakisusi apan pulos negatibo gikan sa sintomas sa A H1N1 virus ang 10 ngadto sa 14 ka mga tripulante niini nga gikan pa sa Malaysia.

Laing barko nga gisusi mao ang gikan sa nasud sa Indonesia nga M /V Watasa nga nidunggo sa pantalan sa lungsod sa San Fernando ug nasuta gihapong negatibo sa sintomas ang mga tripulante.

Ang BQ padayong mihingusog sa monitoring sa tanang mga abyon ug mga barko sa gawas sa nasud nga modunggo dinhi sa Sugbu ug tugpahanan sa Mactan Airport gumikan sa maong sakit.

Karong bag-ohay lang, dunay laing batang lalaki gikan sa United Kingdom nga niabot dinhi sa Sugbo sa milabay'ng semana ang boluntaryong nagpaubos sa quarantine diha sa Vicente Sotto Hospital human kini makasinati og paghilanat pag-abot niya dinhi sa Sugbo pipila ka adlaw human sa iyang beyahi.

Sa paghimo ning balita padayon pang gipaabot sa Department of Health (DOH-7) ang resulta sa swab test sa maong pasyente nga gipadala na sa Research Institute for Tropical Medicine (RITM) sa kaulohan. - Darrel Carumba (BANAT NEWS)