CEBU, Philippines – Nabulit sa linubaan ang lawas sa usa ka 18 anyos nga lalaki dihang gitabangan kini og dunggab sa wala hiilhing mga batan-on nga gituohang sakop sa fraternity didto sa Mulle Osmeña, sa barangay Poblacion, dakbayan sa Lapulapu kagahapon sa alas 12 pasado sa tungang gabii.
Ang biktima mao si Charito Mecamolo, 18, ulitawo nga taga sitio Mercado, barangay Basak, dakbayan sa Lapulapu.
Si SPO2 Danilo Tampus sa kapolisan sa maong dakbayan miingon nga nagpaabot ang biktima sa iyang hinigugma nga nagtrabaho sa dakbayan sa Sugbo.
Apan giduol kini sa grupo sa mga batan-on ug gitabangan og dunggab maayo nalang kay bisan nabulit siya sa mga samad nakadagan pa ngadto sa Police Station 3 diha sa duol sa nahitaboan.
Misirit dayon pagpanagan ang mga kriminal nga wala na magpaabot nga dakpon sila sa mga polis.
Gihatod dayon sa kapolisan ang biktima sa Vicente Sotto Memorial Medical Center samtang padayon pang gipangita ang mga kriminal. - Romeo T. Limpangog (BANAT NEWS)