Paggisal sa hepe sa MICS di madayon

CEBU, Philippines – Posibleng dili mahinayon ang pagpaatubang sa labaw sa Management Information and Computer Services (MICS) sa Cebu City Hall nga si Engineer William Artajo atol sa sesyon sa City Council ugmang adlawa labot sa kontrobersiya sa planong pagpalit sa siyudad og mga laptop computer.

Kini tungod kay gisugyot ni acting Mayor Michael Rama ngadto sa mga sakop sa City Council nga ipadaplin lang una ang nahisgutang hisgutanan.

Nasayran nga giimbitar na si Artajo ug kaubanan niini sa Mics aron gisahon sa mga pangutana sa konseho labot sa giduso niining specifications pagpalit og 24 ka mga laptop computers sa City government nga ihatag ngadto sa mga huwes ug justices dinhi sa siyudad.

Mokapin sa P2.9 milyones ang gastuhon sa gikatahong specifications ug maoy gibasehan ni Konsehal Gerardo Carillo pagduso og resolusyon sa City Council.

Apan gikwestyon ni Konsehal Bebot Abellanosa ang maong resolusyon niadtong miaging semana, tungod kay mahulog nga tag-P80 mil ang matag usa ka laptop.

Ang acting vice mayor nga si Hilario Davide III kinsa mao usab ang presiding officer sa konseho midason sa eksplinasyon ni Abellanosa.

“Tinuod man tong giingon ni Bebot (Abellanosa) nga duna na karoy barato nga mga laptop nga atong mapalit ba,” nagkanayon si Davide.

Gani niingon si Davide nga wala usab manginahanglan og mas mahal nga laptop ang mga huwes tungod kay kini giingong igo lang gamiton pag-type sa ilang mga desisyon.

Tungod niini nasabutan sa mga sakop sa City Council nga ilang paesplikahon si Artajo ug ang pipila sa iyang mga sakop atol sa sesyon sa konseho ugmang adlawa.

Apan matod ni Rama nga iya nang gipakighinabian si Davide ug ang ubang mga sakop sa City Council nga ipadaplin lang una ang pagtuki sa maong kontrobersiya.

Alang sa acting mayor nga mas nanginahanglan pagtagad ang ubang problema sa siyudad inay sa pagpamalit og mga laptop computer. - Elly Bolonos (BANAT NEWS)