CEBU, Philippines – Natabas sa samad ang bitiis sa usa ka 36-anyos nga lalaki human kini tigbasa sa kaaway sa iyang amigo didto sa Santa Teresa I, barangay Dumlog, dakbayan sa Talisay niadtong Biyernes sa gabii.
Ang biktima mao si Jecbonas Luisito, hingkod, nga taga Santa Teresa I, samtang ang suspetsado mao usab si Kennedy Tinador, 26, nga silingan sa biktima.
Nasayran gikan sa kapolisan sa dakbayan sa Talisay nga si Tinador ug ang amigo ni Luisito, nagkaaway hinungdan nga giduol sa biktima ang duha aron uwangon.
Apan mikulisiw sa kasuko si Tinador batok kang Luisito, ug dihadiha gihabas dayon sa iyang sundang ang bitiis sa biktima.
Gumikan sa kasakit, miayagak samtang nagtakiang pagdagan si Luisito pagsumbong sa kapolisan sa kabalaka nga tiwason siya sa suspetsado. Gipangita pa sa kapolisan ang suspetsado. - Brenda D. Batuto (BANAT NEWS)