Mayor sa Boljoon ginganla'g bias

CEBU, Philippines – Gisaway sa mga miyembro sa Iglesia ni Cristo (INC) ang mga opisyal sa kagamhanan sa lungsod sa Boljoon gumikan sa pagka’bias’ niini sa pagpatuman sa balaod.

Kini sa dihang wala sila hatagi og permiso ni Mayor Diogenes Derama sa maong lungsod alang sa ilang ‘religious rally’ nga adto unta ipahigayon sulod sa sports complex sa lungsod.

Si Rodrigo Bragat, usa sa mga opisyal sa INC nagkanayon nga sa tibuok nasud karon pa sila makasugat og usa ka mayor sa gobyerno nga bias ug dili pa sibilisado nga ikatandi niya sa mga mayor sa mga tawong lumad ug halayo sa katilingbang social.

Kini sa dihang gipangatarungan ni Derama nga mas maayo pang disco ug uban pang kalingawan ang ipahigayon sa ilang sports complex kay sa religious rally sa INC.

Si Derama nga wala makontak sa Banat News, gikonpirmahan sa iyang tigpamaba nga si Stephen Villanueva, kinsa nagkanayon nga dili ganahan ang mayor sa INC kay basin kuno makamugna kini og kagubot sulod sa ilang sports complex.

Miingon siya nga mas maayo ang disco ug uban pa nga kalihokan sa lungsod nga ipahigayon sa ilang sports complex kay wala gayu'y kagubot nga mahitabo.

Apan mitug-an si Villanueva nga sukad-masukad wala pa sila makasuway nga may INC nga nagrali sa ilang lungsod nga nagmugna og kagubot.

Sa laing bahin ang kapolisan sa Boljoon nagkanayon nga may mga religious rally nga gipanghimo diha sa ilang lungsod sama sa Seventh Day Adventist, Jehovah’s Witnesses, Born Again Christian ug uban pa nga pulos gihatagan og permiso sa mayor.

Gani matud pa ni PO3 Ernesto Villamor sa Boljoon Police Station nga sila ang kanunay ang mobantay sa palibot kun may mga pundok sa relihiyon nga mopahigayon og rali sa ilang lugar. - Wen Celen (BANAT NEWS)