Swine flu gibantayan sa Sugbu

CEBU, Philippines – Nagtambayayong ang Bureau of Quarantine ngadto sa Department of Health (DOH)-7 pag-monitor sa posibleng pagsulod dinhi sa nasud sa gikahadlakong Human Swine Flu nga nakapatay na og kapin 100 ka tawo sa nasud sa Mexico ug mitakod na ngadto sa Estados Unidos ug Canada.

Duna nay global alert nga giluwatan ang World Health Organization (WHO) may labot niini hinungdan ang Bureau of Quarantine dinhi mibutang na og monitoring personnel sa airport.

Si Dr. Emmanuel Labella mitug-an nga nakadawat na sila sa warning niadtong miaging adlaw ug ang Pilipinas isip usa sa mga signing member nation, miisa sa alert number 3.

Ang mga Quarantine Officers sa Mactan International Airport mipatuman sa contingency plan sama sa ilang gibuhat niadtong miigo ang sakit nga SARS, Ebola virus ug Avian Flu virus.

Gibutang na usab nila og balik ang thermal cameras nga motan-aw sa temperatura sa mga pasaherong mangabot gikan sa gawas sa nasud kung wala ba kini hilanti.

Kun makit-an sa thermal camera nga lapas sa 37 Degrees Celsius ang temperatura sa pasahero dad-on kini sa buhatan sa Bureau of Quarantine sa airport aron pagtubag sa mga pipila ka pangutana ug ipadala sa giandam nga lawak sa Vicente Sotto Memorial Medical Center aron kini obserbahan og pipila ka adlaw una pa kini tugutang makalahos sa ilang biyahe.

Si Agriculture Secretary Arthur Yap miluwat na og kamandoan nga heighten alert ilabi na sa mga airports nga mosulod ug mogawas nga mga pasahero.

Si Ricardo Oblina , regional director sa Department of Agriculture (DA)-7 miingon nga hugot karon nilang gimonitor ang mga livestocks ilabi na ang imported nga karne sa Sugbu.

        Samtang sa iyang bahin si Regional director sa Department of Health nga si Susana Maderieta nipasalig hinuon sa full-coordination sa Bureau of Quarantine ug uban pang ahensya sa gobiyerno aron masigurong dili gyud makasulod ang maong sakit.  – BANAT NEWS