Nagdumili og bakwit ang mga residente sa landfill

CEBU, Philippines - Nagdumili sa pagbakwit ang ubay-ubay nga mga molupyo sa barangay Inayawan ning siyudad sa Sugbu nga apektado sa aso sa sanitary landfill kini bisan pa sa kamandoan sa dakbayan nga adto una sila papuy-on sa Inayawan Sports Complex.

Tulo ka sitio sa nahisgutang barangay ang naapektahan sa bagang aso gikan sa landfill ug kini mao ang Palwa Maria, Ocampo Drive ug Santo Niño kansang mga residente duna nay nasakit.

Ang naapektahang mga molupyo giingong igo lang moduol sa sports complex kung dunay tambal, pagkaon ug uban pa nga ipanghatag ngadto kanila.

Gitataw hinuon ni Konsehal Gerardo Carillo nga dili pinugsanay ang pagpabakwit sa mga residente ngadto sa nahisgutang evacuation center, si Carillo maoy chairman sa Cebu City Disaster Coordinating Council miingon nga ang mahinungdanon nga ang mga molupyo mahatagan sa ilang gikinahanglan.

“Actually, voluntary ra man ang pagpabakwit, ang importante nga matubag nato ilang panginahanglan ilabi na sa mga bata sama sa respiratory concern,” sumala ni Carillo.

Una nang gikataho nga mokapin sa usa ka gatos ka mga residente duol sa landfill ang nangasakit sukad nisilaob ang dumpsite sa miaging semana mugna sa kainit sa panahon.

Gipadayag hinuon ni Carillo nga gipangitaan na og dinaliang solusyon sa kagamhanan sa dakbayan ang nahisgutang problema.

Gani nagkanayon ang konsehal nga gawas sa pagpasirit og tubig sa kabumberohan matag karon ug unya, gilungagan na usab ang landfill aron makahungaw ang kainit niini.

Nangabang na usab og nagkadaiyang mga heavy equipment ang City government alang sa mobilization diha sa nahisgutang dump site.

Sa kasamtangan, niingon si Carillo nga niarang-arang na ang sitwasyon sa landfill apan ang konsehal nidugang nga padayon gihapon ang ilang gihimo nga monitoring niini.

Una nang gihulagway sa chairman sa Committee on Health sa City Council nga si konsehal Christopher Alix nga susama na sa bomba nga bumubuto ang nahisgutang landfill.

Kini ang hinungdan nga girekomendar sa konsehal ang dinaliang pagpabakwit sa mga molupyo nga nagpalibot sa dumpsite. – BANAT NEWS