Frostrom gilubong na kagahapon

CEBU, Philippines - Pormal nang gihatud sa lubnganan kagahapong adlawa si Presidential Management Staff undersecretary Malou Frostrom sa Mactan Island Memorial Gardens sa barangay Marigondon dakbayan sa Lapulapu.

Ang mga kabanay, dagkong opisyal ug mga kahigalaan niini maoy mihatud kaniya.

Si Fr. Dan delos Angeles sa Cardinal's Palace ug Fr. Jose Jumao-as sa San Fernando mihulagway nga si Frostrom bulahan sa tanan gumikan kay namatay kini atol sa Semana Santa ug gilubong atol usab sa pagkabanhaw sa Ginoo.

Matud pa ni Fr. delos Angeles nga angayan nga ikalipay sa pamilyang Frostrom nga si Malou migradwar na sa iyang mga gimbuhaton sa kalibutan ilabi na sa pagsilbi sa katawhang Pilipinhon.

Si Frostrom dako og papel sa katawhan sa dakbayan sa Lapulapu ug nakapatukod og day care center sa sitio Saac dakbayan sa Lapulapu ug sa uban pang dapit sa kauluhan.

Human sa Santos nga Misa ang mga kahigalaan mipadayag sa dakong pasalamat sa mga nahimo ni Frostrom ilabi na ngadto sa lalawigan sa Abra nga daghan siya'g natabangang kabus.

Si Jan Frostrom, nagkanayon nga masinabtanon ug mahigugmaong asawa si Malou taliwala sa kalisod sa trabaho niini sa kiliran ni Presidente Gloria Macapagal Arroyo ug kining tanan iyang ikapasigarbo sa tanan.

Samtang di mapunta sa wala ang nasugdang day care center ni Malou diha sa barangay Buaya tungod kay ipadayon kini sa iyang igsuong si Myrna Abellar.

Karong adlawa ilusad usab ang "Malou Frostrom Foundation" nga pasiugdahan sa iyang bana nga si Jan ug ang suporta gikan usab sa nasud sa Sweden diin si Frostrom nagsumikad.

Lakip sa mitambong mao sila si Lapulapu City Mayor Arturo Radaza; Senador Miguel Zubiri; 6th Dist. Cong. Nerissa Soon-Ruiz; Agusan del Sur Gov. Tina Plaza, Cebu Gov. Gwendolyn Garcia; Candaba-Pampanga Mayor Jerry Pelayo ug mga opisyales sa dakbayan. - Bong Soriano (BANAT NEWS)