Mga numero ni VP Sara

Kon kumbinsido ang kampo ni Bise Presidente Sara Duterte nga maguba nila ang testimoniya sa forensic financial expert sa prosekusyon nga si Atty. Alexander Cabrera pinaagi sa testimoniya ni Atty. Suzette Punay, napakyas sila.

Gawas nga walay napakita nga mga dokumento, sukwahi sa naglut-od nga papeles nga gibasehan sa upat ka buwan nga pagtuon ni Cabrera sa mga ebidensiya, giduot pa gyod niya si VP Sara pinaagi sa pagbisto nga nakadawat diay og kuwarta gikan sa kompaniya nga wala niya panag-iyaha pero gilista sa iyang statements of assets, liabilities and net worth (SALNs).

* * *

Imbes lalison ang dagkong mga numero nga gipahibawo ni Cabrera sa senator judges isip iyang banabana sa katigayonan nga gitagoan ni VP Sara gikan sa SALNs ug income tax returns (ITRs) sa Bureau of Internal Revenue (BIR), gidaginot sa depensa ang gagmayng numero nga iyang nahisgutan.

Sama sa P205 mil nga panihapon sa Tokyo, Japan (nga giingong gitabangan og kaon ug bayad nilang Mans Carpio ug 10 ka higala); P256 mil nga sapatos sa Malaysia (nga para kuno sa mga atleta ug mga ginikanan); ug P212 milyones nga bahin sa GenCorp Industries Inc. kay P2.14 milyones ray nadawat 2022-2025 (nadugangan hinuon ang tubagunon ni VP Sara).

* * *

Duha ka dagkong banabana ni Cabrera:

• Una, konserbatibong banabana nga P817.87 milyones (bank balances nga P207.7 milyones; bahin sa GenCorp nga P212.63 milyones; kita sa Cale88 Foods Corporation ug Metro City Chow Foods nga P142.20 milyones; ug ubang kita nga P255.34 milyones); ugIkaduha, maximum niyang banabana nga P1.5 bilyones (konserbatibong banabana nga gipun-an sa confidential funds nga P475 milyones; discrepancies nga nakit-an sa Anti-Money Laundering Council nga P100 milyones; ug 45% nga bahin sa GenCorp nga P250 milyones).

* * *

Gipangutana si Cabrera sa senator judges pilay mahibilin sa hidden wealth ni VP Sara kon dili i-apil ang kita sa mga kompaniya? Iyang tubag: Kon kuhaon ang P354.83 milyones nga kita sa tulo ka kompaniya, mabinlan og P463.05 milyones sa bank accounts ug insurance records.

Nga dako gihapon kaayo og labaw (P364.45 milyones) sa iyang net worth sa 2025 SALN nga P98.6 milyones.