CEBU, Philippines - Andam na ang kapin sa usa ka gatos ka mga casts sa ika-12 nga Buhing Kalbaryo pagpakita sa ilang presentasyon ugmang adlawa, Biyernes Santo.
Kini maoy gibutyag ni Al Evangelio, ang director sa nahisgutang buhing paghulagway sa pasyon ug kamatayon ni Hesus sa Krus.
Ang presentasyon magsugod sa alas 10:30 sa buntag diha sa San Nicolas Parish ground agi sa barangay Calamba ug tapuson sa simbahan sa Guadalupe.
Subay niini giawhag ni Evangelio ang mga Sugbuanon nga sa makausa pa musaksi sa ilang tinuig nga presentasyon matag Biyernes Santo.
“Ako lang giawhag ang mga tawo nga please come and watch what happen to our Lord nga amo gyud nga i-reenact with truth and sincerity,” sumala ni Evangelio.
Una nang gipasalig sa director nga makahuluganon ug mabulukon gihapon ang ilang presentasyon bisan kung walay mahitabong paglansang sa Krus niining higayuna.
Kini tungod kay giingong paspas ang estilo, dayalogo ug lihok sa mga partisipante sa Buhing Kalbaryo.
Nahimong kulbahinam ug giatngan sa mga tawo ang nangaging Buhing Kalbaryo tungod kay ilansang gyud ang nagdala sa papel ni Hesus.
Apan niining higayuna gisuspenso una ang paglansang human sa kontrobersiya nga nasugatan sa mga organizer niadtong miaging tuig.
Kini dihang nakalimtan pag-inject og anesthesia ang mga kamot ni Jose Marvi Escuyos kinsa maoy nagdala sa papel ni Hesus atol sa crucifixion.
Ang maong sitwasyon niresulta sa pag-ilaid ni Escuyos sa tumang kasakit matag dukdok sa lansang nga nakapangilubkilob usab sa mga nakasaksi.
Una nang gipadayag ni acting mayor Michael Rama nga mahimo gihapon ang reenactment bisan kung walay mahitabong pagpanglansang.
Kini maoy buot pamatud-an ni Evangelio ug sa mga casts sa Buhing Kalbaryo atol sa lain na usab nilang presentasyon ugmang adlawa. (Elly Bolonos) (BANAT NEWS)