Pagbutang og express lane para sa senior citizens sa eleksiyon lisud buhaton

CEBU, Philippines - Giangkon ni Cebu City North District Election Officer Marchel Sarno nga lisod ipatuman ang special voting precincts alang sa mga senior citizen sa siyudad ug sa gitawag og Person With Disability (PWD) sa umaabot nga piniliay.

Kini bisan pa man kung gipadayag sa election officer nga siya sensitibo usab sa kahimtang sa mga edaran ug niadtong dunay kakulian sa panglawas.

Matud pa ni Sarno nga dako kaayong trabahuonon sa Comelec kung himuon ang maong lakang ug wala na sila’y panahon alang niini.

Kini tungod kay giingong halos tanang gatusan ka polling precincts sa dakbayan dunay mga PWD ingon man mga senior citizen.

Labaw sa tanan miingon si Sarno nga wala usab sila tuguti sa balaud pagbalhin sa usa ka botante gikan sa usa ka presinto ngadto sa laing polling precinct.

“Kinahanglan gyud una nga amindahan o himoan na og balaud kay sa atong level without any law dili man ta allowed mohimo ana,” sumala ni Sarno.

Si Konsehal Rodrigo Abellanosa maoy misugyot nga himoan gyud og special voting precincts ang mga senior citizen sa siyudad sa umaabot nga piniliay.

Kini gumikan sa mga reklamo gikan sa maong sektor nga wala makabotar sa nangaging eleksyon tungod sa ilang nasinati nga kahasol.

Ang konsehal nga maoy chairman sa Cebu City Senior Citizens’ Council nitataw nga nalatid sa balaud nga ang mga edaran hatagan og express lane.

Ingon usab niini ang angayang ihatag ug masinati sa mga tawo nga dunay kakulian sa panglawas sibo sa nalatid sa Accessibility Law.

Gitataw ni Abellanosa nga dili exempted ang Comelec sa pagtuman sa gimbut-an sa balaud alang sa mga senior citizen ug PWD.

Gipadayag hinuon ni Sarno nga ilang pangitaan og paagi nga mabutang sa ground floor sa matag tunghaan ang presinto nga dunay daghang mga PWD ug senior citizen. (Elly Bolonos)   (BANAT NEWS)