CEBU, Philippines - Gikinahanglang mabinantayon ang kapolisan sa dakbayan sa Sugbu ning panahona aron mamintinar ang kahusay ug kalinaw sa siyudad samtang gitamod sa Kristohanong katilingban ang Semana Santa.
Ang maong lakang gimando ni acting mayor Michael Rama ngadto sa mga konsehal sa wala pa kini molarga pa-ingon ngadto sa China niadtong Biyernes.
Apan si CCPO Director Senior Superintendent Patrocinio Comendador ingon man ang mga station commander nagkanayon nga naandan na nila kining trabaho matag tuig.
Ang acting m ayor sa sayo pa nabalaka nga basin inom nalay atubangon sa kapolisan ning dakbayan ug dili na tarungon og bantay ang palibot sa dakbayan sa Semana Santa.
Kini tungod kay may nadawat nga report sa acting mayor nga dunay pipila ka police station ubos sa CCPO nga naglaundok ang daghang basiyo sa beer sa likoran niini.
Maoy hinungdan nga gipahimangnoan sa acting mayor ang kapulisan nga likayan ang pag-inom-inom sulod sa mga presinto ug atimanon ang ilang gimbuhaton.
Samtang si Acting Mayor Hilario Davide III miawhag sa kapolisan nga tumanon nila ang pahimangno ni Rama nga palapdan ang police visibility ilabi na sa mga dapit nga anaay simbahan.
Matud ni Davide nga suwayan nila ang pagsuroy sa mga police station aron sutaon ang giingong pag-stock niini og daghang beer sa likoran sa ilang opisina. – BANAT NEWS