Ang di magpa-drug test di pasudlon sa SBT

CEBU, Philippines - Did-an na ang mga drayber sa minibus nga makasulod sa South Bus Terminal kun magdumili sa pagpaubos sa random drug testing ug kadtong masakpang tiggamitan og illegal drugs.

Ang maong hangyo gikan ni Julie Flores nga maoy presidente sa Association of Southern Cebu Mini Bus Operators ngadto sa Capitol Consultant Byron Garcia.

Si Garcia nahinabi sa Banat News atol sa Tapok-Tapok sa Kia Gorordo kagahapon miingon nga maayong lakang ang gihimo sa kahugpongan sa mga minibus operators nga madesiplina ang ilang mga miyembro partikular na ang mga tiggamitan og ginadiling drugas.

Ang random drug test sa mga driver sa minibus ang natigayon human sa nahitabong aksidente sa EDC minibus nga misampak sa kasugat nga trak nga mikalas og 14 ka mga pasahero ug grabeng nakaangol sa lima.

Gipasiugdahan sa Land Transportation and Franchising Regulatory Board-7 ug Land Transportation Office (LTO) 7 ang drug testing aron masuta kun duna bay mga addict nga drivers.

Dili hinuon pabor si Garcia sa drug testing tungod kay di solusyon ang maong lakang aron malikayan na ang aksidente diha sa mga kadalanan.

Kini tungod kay mawagtang lang ang mga aksidente sa mga minibus kung suweldohan og klaro sa mga minibus operators ang ilang mga drivers ug wagtangon na ang “Abang System.”

Nitataw si Garcia nga kasagaran sa mga drivers sa minibus kanunay lang magdali ug magpakusog sa ilang pagpadagan kay nangiyawat o di ba kaha nangindahay nga makaabang sa ilang minibus.

Gumikan sa sobrang pagdali, miingon si Byron mahitabo na hinuon ang aksidente sa kadalanan.

Si Garcia mipadayag nga iyang irekomendar kang Gov. Gwendolyn Garcia ang pag-ban sa mga drivers nga badlungon diha sa Cebu South Bus Terminal. - Rey Pasaporte (BANAT NEWS)