South Bus Terminal butanga'g daghang polis sa Semana Santa

CEBU, Philippines - Hugot nga seguridad nga ipatuman ni Capitol Consultant Byron Garcia diha sa Cebu South Bus Terminal karung sunod semana.

Matud pa ni Garcia nga mihangyo na siya og usa ka grupo sa Special Reaction Unit (SRU) nga i-destino diha sa Cebu South Bus Terminal sa pangulo sa kapolisan sa lalawigan Sr. Supt, Carmelo Valmoria.

Nagkanayon si Garcia nga gawas sa kapolisan duna sab silay gipabantay nga mga blue guards diha sa maong terminal aron masigurong luwas ang mga sumasakay paingon sa tagsa-tagsa ka probinsya.

Matud niya nga sugod karung Lunes Santo ila nang pang-inspeksyonon ang mga bagahe ug bag sa mga pasahero nga mosulod sa terminal.

Hinuon nagtuo si Garcia sama sa milabay’ng semana santa malinawon ug hapsay gihapon ang Cebu South Bus Terminal.

Sa iyang bahin si Land Transportation Office-7 director Raul Aguillos nagkanayon nga istriktong ipatuman nila ang lagda sa trapiko atol sa pagtamod sa semana santa aron malikayan ang posibleng disgrasya sa kadalanan.

Matud ni Aguillos nga ilang ilusad ang Oplan Semana Santa sugod karong Martes hangtud na sa liwas sa adlaw’ng Domingo.

Ang LTO-7 magbutang usab og help desk nga kaduolan ug kasumbongan sa mga pasahero diha sa maong terminal ug ingon man sa One City Link Terminal.

Gawas niini ipakatap sab ang mga deputized agent sa LTO ingon man ang “Task Force Alpha” sa kadalanan aron magmonitor niadtong mga sakyanan nga mag-over loading. - Rey Pasaporte (BANAT NEWS)