Gamay ra ang nakapasar sa ALS sa Cebu City

CEBU, Philippines - Wala maalarma ang kadagkuan sa edukasyon sa dakbayan nga gamay ra ang nakapasar sa siyudad sa Sugbu sa 2008 Alternative Learning System (ALS) Accreditation and Equivalency Test nga gipahigayon niadtong miaging Oktobre.

Sa kinatibuk-ang 2, 236 nga nikuha sa nahisgutang pasulit dinhi sa dakbayan, 435 lang niini ang nagmalampuson ug nakapasar diin 28 niini gikan sa elementary level; ug 407 usab ang pasado sa secondary level (high school).

Ang mga mipasar makapadayon na pagtungha sa high school ug sa kolehiyo.

“Ingon ana ra gyud ang kasagaran nga figures ba kay kadiyot ra man gud ang learning sessions ana, unya depende ra pud na sa gana sa mga learners ba,” sumala pa ni City Schools Division Superintendent Doctor Lorna Rances.

Gani gipasigarbo pa ni Rances nga sa nangaging eksaminasyon sa ALS, kanunay nga mag-una ang dakbayan sa rehiyon sa labing daghan og nakapasar.

Nasayran nga lakip sa mikuha sa pasulit niadtong miaging tuig mao ang gatusan ka undergraduate nga mga kawani sa Cebu City Hall.

 Wala pa hinuon matino sa buhatan ni Konsehal Gerardo Carillo kung duna o pila ang nakapasar sa mga empleyado sa kagamhanan sa dakbayan.

Apan ang konsehal nga maoy chairman sa Committee on Education sa City Council malaumon nga ubay-ubay sa mga examinees ang nagmalampuson.

Matud ni Carillo nga iya pa nga gipasusi sa iyang staff kung kinsa sa mga kawani sa City Hall ang nakapasar ug makadawat unya og diploma.

Sa nasayran, dunay kinatibuk-ang 12, 486 ang mikuha sa nahisgutang pasulit sa elementary level lukop nasod, apan 2, 514 lang niini ang nakapasar.

Samtang sa secondary level, dunay kinatibuk-ang 97, 756 usab ka examinees, apan 22, 430 lang usab niini ang gikatahong nagmalampuson.  - Elly Bolonos (BANAT NEWS)