Naga, Bogo posible manaktak kawani

CEBU, Philippines - Mga dakbayan nga gibalik pagka-lungsod pinaagi sa desisyon sa Korte Suprema posibleng manaktak og kawani.

Si Mayor Celestino Martinez Jr. sa Bogo miasoy sa Banat News nga manaktak og kawani ang city hall kun mahimo nang ‘final’ ang desisyon sa Korte Suprema nga magbalik sa Bogo pagka-lungsod, apil na ang Naga ug Carcar.

Ang Bogo, sumala pa ni Martinez, adunay 392 ka mga kawani, lakip na ang mga job orders. Sa dihang lungsod pa kini, aduna kini P60 milyones nga Internal Revenue Allotment, apan sa dihang nahimo kining siyudad, nahimo kining P160 milyones.

Apan si Mayor Valdemar Chiong sa Naga nagkanayon nga “never say die” human sa hukom sa Korte Suprema, dungan ang pag-ingon nga aduna pa silay higayon pagsang-at sa ikaduhang motion for reconsideration.

Matud pa usab ni Chiong nga si Kongresista Eduardo Gullas misaad sa mga taga Naga nga moumol og laing balaodnon aron ipahimo gyud nga siyudad ang Naga.

Sumala pa ni Chiong nga katunga unya sa 300 ka mga kawani sa Naga, apil na ang job order, ang posibleng mataktak kun mabalik gyud sa pagka-lungsod ang Naga.

Si Sr. Supt. Carmelo Valmoria, direktor sa Cebu Provincial Police Office, nagkanayon nga makaapekto sa gimbuhaton sa kapolisan ang desisyon pagpabalik pagka-lungsod sa Naga, Bogo ug Carcar.

Matud ni Valmoria nga mogamay na unya ang alokasyon nga pundo alang sa programa sa kahusay ug kalinaw tungod sa pagkagamay na lang unya sa IRA.

Hinuon, giklaro ni Valmoria nga bisan pa niini, andam gihapon sila nga mopatunhay sa kahusay ug kalinaw sa mga lungsod ug siyudad sa lalawigan. – BANAT NEWS