Ulitawo milampos sa paghikog

CEBU, Philippines - Usa ka ulitawong kadaghan na mosuway sa paghikog apan nasanta sa iyang mga ginikanan, milampos gyud kini sa pagpakamatay pinaagi sa paghikot og kable sa PLDT sa iyang liog nga gigaid sa punuan sa bayabas didto sa sitio Kagudoy, sa barangay Basak, dakbayan sa Lapulapu sa miaging gabii.

Ang biktima giila nga si Rodulfo Ompad Estardo, 42, ulitawo, nga taga Kagudoy kansang lawas nagbitay na sa bayabas diin siya milukso human ikagaid ang tumoy sa kable sa sanga sa maong bayabas sa likod sa ilang balay.

Si PO1 Jessel Pal-ing sa Lapulapu Police Station nagkanayon nga giangkon sa mga sakop sa pamilya sa biktima nga makadaghan na kini mosulay sa paghikog apan dali kini nilang mapakgang busa napakyas kini pirme.

Matud pa ni PO1 Pal-ing nga ang unang paghikog niini, miinom og gas , apan gidala dayon sa mga ginikanan ngadto sa hospital hinungdan nga nasalbar kini.

Apan sa miaging gabii, wala na kini mabantayi sa mga ginikanan ug igsoon hinungdan nga milampos kini sa pagpahulay sa dayon ug gani wala nalang paawtopsihe sa mga tagtungod kay kombinsido sila nga tinuyo ra sa biktima ang maong kamatayon.

Wala usab nila ibutyag kun ngano nga nakagusto kini sa pagpahuway nga wala nay bangon-bangon. -  BANAT NEWS