Call Center Agent naghikog - LCPO

CEBU, Philippines - Walay foul play ang kamatayon ni John Israel Ladiao kinsa naghikog sa usa ka hotel sa sitio Humayhumay, barangay Gun-ob, dakbayan sa Lapulapu sa miaging adlaw.

Kini ang nasayran sa Banat News sa follow up nga gihimo sa homicide section sa kapolisan sa maong dakbayan kagahapon base usab sa resulta sa autopsy report sa Philippine National Police (PNP) Crime Laboratory.

Si SPO4 Rolito Jumao-as mibutyag sa Banat News  nga ang kahilabihan kadako sa bayrunon sa biktima nga mokabat sa P391, 539.92 sa iyang pagpuyo sa maong hotel sugod niadtong Pebrero 12 niining tuiga maoy hinungdan sa kaguol niini nga misangpot sa iyang paghikog.

Dugang pa ni SPO4 Jumao-as, nga ang biktima nadiskobrehan sa house keeping supervisor sa maong hotel nga si Marilou Lozada nga naghigot og hose sa tubig sa iyang liog ug nagbitay na sa hagdanan.

Gituhoan nila ni SPO4 Jumao-as nga malagmit nabug-atan sa problema ang biktima ug maoy hinungdan nga midangop na lamang kini sa paghikog aron maimpas ang tanan, puslan man.   (Romeo T. Limpangog)   (BANAT NEWS)