Naghupot og shotgun tiklo

CEBU, Philippines - Gibalhog dayon sa prisohan ang usa ka tawong nasikop sa kapolisan nga naghupot og armas de fuego didto sa barangay Talo-ot, lungsod sa Argao sa miaging Biyernes sa gabii.

Si Werlito Albarracin, 35, taga sitio Tulo-tulo, barangay Bulasa, Argao nagpaabot nalang sa tukmang kaso nga iyang atubangon ugma, Lunes, human sakmita sa kapolisan ang iyang   shotgun nga may lima ka buhing bala. Matud pa ni PO1 Benjamin Gerozaga Jr., sa Argao Police Station nga didto nila hidakpi ang suspetsado sa balay sa ginganlan og “Batibot” sa Talo-ot.

Kini human nila madawat ang tip sa usa ka nagpakabana nga molupyo kinsa maoy nakadiskitar kang Albarracin nga may armas de fuego.

Sa kabalaka sa maong molupyo nga may kagubot nga mahitabo, misumbong dayon kini sa kapolisan ug sa pagresponde sa mga otoridad wala na makaikyas si Albarracin. Kasong illegal possession of firearm maoy atubangon sa dinakpan. - Lesley Caminade (BANAT NEWS)