Grupo ni Quimada mas dako ug organisado - Sr. Insp. Bastes

CEBU, Philippines - Gihulagway sa kapolisan nga mas organisado ug lig-ong grupo sa mga tulisan nga nanulis sa Fooda Savers Mart diha sa barangay Kamputhaw ning dakbayan sa Sugbu kun itandi sa banggiitang grupo ni Rey Torres kinsa nabilanggo na karon sa Cebu City Jail.

Kini maoy gibutyag ni Sr. Insp. Michael Anthony Bastes, hepe sa Theft and Robbery Section (TRS) Cebu City Police Office (CCPO).

Usa sa mga nailhang suspek sa pagtulis sa maong establisamento nga si Jose Roy Quimada, 38, nga taga Sta. Lucia District sa Pagadian City napasakaan na og kasong robbery niadtong Lunes.

Ang grupo mitulis sa Fooda Savers Mart ug nadala ang P100 mil nga sinsilyo human ilara ang mga gwardiya nga sila mga polis nga miresponde og shooting alarm.

Sumala pa ni Bastes nga ang grupo ni Quimada kun mohimo’g operasyon mga tag-as gyud nga klase sa armas ang gamiton dili sama sa kang Torres nga mga mugbong armas sama lang sa kalibre .45. Base usab sa ilang intelligence report si Quimada, mangunay pag-surveillance sa mga establisamentong ilang tulison sama sa gihimo niini sa Aspac Bank sa Tabogon pipila na ka tuig ang nakalabay.

Gibutyag usab ni Bastes nga si Quimada, mao gyuy lider sa walo ka mga tulisan nga nanulis sa Fooda Savers Mart diin usa kining nag-sul-ob sa PNP athletics attire.

Matud pa nga si Quimada, positibong giila sa duha ka mga security guard nga sila si Jessie Rey Bahinting ug Geofrey Luna nga maoy niduol kanila ug nideklarar nga tulis human usab makit-i ang hulagway niini sa rouge gallery sa kapulisan. - Guam Logroño (BANAT NEWS)