Nag-'Rambo' arestado

CEBU, Philippines - Usa ang nadakpan sa tulo ka mga armadong lalaking nag-ramborambo ug nagpabuto sa ilang mga high-powered nga armas sa eskuwelahan sa bukirang bahin sa barangay Can-aga lungsod sa Sibonga ug nanghulga pa sa mga nirespondeng tanod niadtong Miyerkules sa alas 4:00 sa hapon.

Wala kaugpo ang suspetsadong si Edwin Sarda, 44, molupyo sa barangay Poblacion apan lumad sa nahisgutang lugar ug giilang maoy isog-isog sa maong lugar.

Si Sarda nakuhaan og armas nga KG9 machine pistol nga dunay duha ka magazine nga may sulod nga 22 ka mga bala sa 9mm.

Samtang ang duha ka mga kauban niining nakaikyas mao ang magsuong Notche Abella ug Rannil Abella pulos mga molupyo sa maong lugar.

Matud pa ni PO3 Antonio Sanchez sa Sibonga Police dihang nahinabi sa Banat News ang mga tanod sa barangay pinangulohan sa hepe nga si Nemesio Padigos nakadawat og sumbong kabahin sa mga kalalakin-ang nagpabuto og mga armas sulod sa school campus nga nakapahadlok sa mga tinun-an ug magtutudlo.

Sumala pa sa report si Sarda armado og KG9 machine pistol samtang ang magsuong Abella armado usab kini og kalibre .45 nga pistola.

Apan dihang miresponde na ang mga tanod gipangtionan hinuon sila sa mga suspek lakip na ang hepe nga si Padigos.

Wala makabantay ang mga suspek sa kalit nga pag-abot sa mga sakop ni Padigos nga sila si Alejandro Ortestas ug diretsong midumog kanila hinungdan nga nahitabo ang ginukdanay.

Si Sarda nadakpan human kini makorner sa dapit nga iyang gidaganan ug nadisarmahan sa maong armas ug gi-turnover nila sa kapulisan.

Kasong illegal possession of firearms ang ipasaka sa kapulisan batuk sa suspek lakip na ang duha niini ka mga kauban.

Hangtud ning pagsulat sa balita wala pa matino sa kapolisan kung unsay motibo sa mga suspek nga nagpabuto sila og armas diha sulod sa maong tunghaan apan gikatahong mao kini mga maghari-hari sa maong lugar. - Darrel Carumba (BANAT NEWS)