CEBU, Philippines - Ipadangat sa mga kadagku-an sa Hotel, Resort and Restaurant Association of Cebu (HRRAC) ngadto sa Malacañang ang pagsupak nila sa usbaw sa bayranan sa kuryente nga ipatuman sa National Power Corporation (NPC) sugod karong Abril.
Ang presidente sa HRRAC nga si Marco Protacio nagkanayon nga bug-at na kaayo sa ilang bahin ang gisugyot sa NPC nga usbaw nga balig 20 porsyento kay nagbaguod na sila karon sa kadagko sa ilang bayranan sa kuryente matag buwan.
Dugang pa ni Protacio nga ang 5 porsyento nga umento sa bayranan sa kuryente mas gaan-gaan og dyutay itandi sa 20 porsento nga matud pa makapabuslot sa bulsa tungod kay ang mga hotel sa Sugbo magbayad og P6 milyones matag buwan sa konsumo sa kuryente niini ,o mag-agad sa gidak-on sa usa ka establisamento.
Si Protacio gustong masayod kun unsay basehanan sa taga NPC niining ilang lakang sa pagpaumento og 20 porsyento sa bayranan sa kuryente.
Gusto nilang manginlabot ang Malacanang niini kay ang industriya sa hotel nakatabang og dako sa kalamboan sa ekonomiya sa nasud. - Lesley Caminade (BANAT NEWS)