Babaye giluba tungod sa selos

CEBU, Philippines - Nalandig sa tambalanan ang usa ka 29-anyos nga babaye human kini dunggaba sa usa ka lalaking minyo kinsa nangangkon nga iyang uyab tungod sa selos niadtong Martes sa gabii diha sa sitio Kimba, barangay San Roque, dakbayan sa Talisay.

Ang biktima giila sa mga polis nga si Roxane Talabu, residente sa nahisgutang lugar, dalaga apan dunay anak kinsa nakaangkon og samad dinunggaban sa walang bahin sa iyang lawas ang daling gidala sa iyang silingan ngadto sa Talisay City District Hospital apan tungod sa kahimtang niini gibalhin ngadto sa Vicente Sotto Memorial Medical Center.

Ang suspetsado mao si Maximo Montero, 45, residente usab sa nahisgutang lugar kinsa miikyas human sa pagpanunggab niini apan nasikop kini nila ni Vicente Manoz ug Marino Gino, mga tanod sa maong barangay ug gitugyan ngadto kang PO2 Lino Diez sa homicide section sa Talisay City Police Station.

Si Montero ang nagtingkagol karon sa Talisay City detention cell.

Base sa pasiunang imbestigasyon ni Diez nga si Montero ang nangangkon nga uyab sila ni Talabu apan usa ka buwan na silang walay tinagdanay apan ang maong pangangkon ang gihimakak sa biktima ug nagkanayon kini nga dugay nang naibog kaniya ang suspetsado apan wala kini niya panumbalinga.

Sa wala pa mahitabo ang maong insidente si Talabu ug ang asawa ni Montero nga si Remedios ang magsige og away diin gikatahong tungod sa selos ang hinungdan sa away.

Matud ni Diez nga niadtong Martes sa gabii si Montero ug ang asawa niini ang parehong nakainom.

Si Talabu kinsa diha sa balay sa ilang silingan ang kalit lang gidunggab ni Montero sa walay igong rason. - Brenda D. Batuto (BANAT NEWS)