Taxi driver gipatay sa pasahero

CEBU, Philippines - Namatay dihadiha gilayon ang usa ka taxi driver human kini pusila sa iyang pasahero mga alas 9:10 pasado sa miaging gabii diha sa may 13th Avenue, North Reclamation Area, barangay Tejero ning dakbayan sa Sugbo.

Ang namatay giila sa kapolisan nga si Gregorio “Gerry” Presores, 54, drayber sa Kumgang Taxi nga nagdala sa plakang GXD 277 nagpuyo sa Sitio Humay-Humay barangay Pajo dakbayan sa Lapulapu ug lumad nga taga barangay Rizal lungsod sa Pinamungajan

Si Presores namatay human usab kini makaangkon og samad pinusilan sa tuong bahin sa dunggan gikan sa wala pa matinong kalibre sa armas nga maoy gigamit sa wala pa usab mailhing mamumuno.

Sa imbestigasyon sa kapolisan ang mga nakasaksi sa pagpamusil mitug-an nga ang maong taxi kalit lang naabot sa maong lugar nga mihunong tunga sa dalan dayon gisundan sa duha ka sipang boto sa armas gikan sa sulod.

Nakit-an sa mga saksi nga ang drayber nagdali sa paggawas gikan sa gimaneho niining taxi apan pipila ka metros nahagba kini ug dihadiha migawas ang pasahero gikan sa front seat, miduol sa biktima ug gitiwasan sa pagpusil.

Human sa maong pagpamusil ang pasahero maoy midala sa taxi ngadto na sa dalan S.Osmeña St. ug mipaingon ngadto sa dakbayan sa Mandaue.

Pipila ka minutos ang maong taxi nakit-an na lang kining giabandonar nga gi-parking sa atubangan sa Cathay Builders sa may Don Roman building nga nahimutang sa Ouano Ave, North Reclamation Area barangay Subangdaku.

Si SPO1 Jay Yballe, chief investigator sa Homicide Section sa Cebu City Police Office nga nahinabi sa mga tigbalita ang mipadayag nga dili pa matumbok kun tulis ba ang motibo sa pagpatay sa maong taxi driver.

Matud pa niini nga ang taxi unit tua pa sa Scene of the Crime Office (SOCO) ug wala pa gyud maablihi nga posibleng aduna pay mga ebidensyang ilang makuha.

Ang hepe sa Investigation and Detective Management Branch (IDMB) Chief Insp. George Ylanan miawhag sa mga taxi driver nga mohunong gyud kini og mga checkpoint sa kapolisan aron masuhid ang ilang mga pasahero nga malayo sila sa risgo.

Subay niini si Supt. Louie Oppus, hepe sa Operations and Plans Division sa PRO-7 miduso og direktiba nga ipa-apil gyud sa checkpoints ang mga taxi. – BANAT NEWS