BID officials ug Fiscal Castro mag-atbang og kiha tungod sa kurapsyon

CEBU, Philippines - Maglumba og kinihaay ang mga opisyales sa Bureau of Immigration and Deportation kun BID 7 ug Fiscal Mary Ann Castro gumikan sa ilang panagbangi sud sa buhatan sa BID 7.

Ang mga opisyales ug empleyado sa BID 7 pinangulohan ni regional director Casimiro Madarang III naglaraw nga palagputon si Fiscal Castro sa ilang buhatan samtang naulahi mibahad usab sa pagpasaka og kasong graft and corruptions batok sa maong mga opisyal.

Si Madarang sa gipatawag niining press conference mipasangil nga kanunay silang hulgaon ni Castro og kiha matag duna kini gustong buhaton nga di matuman.

Usa na niini ang nahitabo niadtong milabayng Martes, si Castro gipasanginlang mihulga kang Fernando San Ramon, presidente sa Cebu Immigration Officers and Employees Association Inc. kun CIOEAI sa MCIAA nga pasakaan og kaso kung magdumili sa pagbayad sa iyang overtime pay kada bulan nga P20 mil.

Si Madarang nagkanayon nga walay katungod si Castro nga makakuha overtime benefits sa tugpahanan tungod kay kini alang lang sa mga immigration officers ug walay labot ang mga confidential agents ug detailed fiscals sa BID 7.

Gipasabot ni Madarang nga human sa oras tingtrabaho ang mga immigration officers lang ang maka-duty lapas sa oras tingtrabaho sa MCIA gumikan sa mga arrivals partikular na sa alas-singko sa hapon hangtud sa kaadlawon.

Gawas sa overtime pay duna say refunds sa ilang transportation ug food allowances gikan sa mga airline companies.

Ang mga alegasyon sa mga BI officials gipanghimakak ni Castro atol sa pakighinabi sa Banat News samtang tua kini sa Ozamis City.

Matud pa ni Castro wala siya manghulga sa mga BI personnel sa MCIA ug ang iya lang gipangayo kang San Ramon mao ang kopya sa Articles and By Laws sa ilang asosasyon.

Ang maong mga dokumento sumala pang Castro niadto pang milabayng tuig niya gipangayo apan niini rang semanaha gihatag ni San Ramon.

Gipanghimakak usab ni Castro nga nangayo siya og P20 mil nga overtime pay ug tumotumo lang kini sa mga opisyales sa BID 7.

Si Castro desididong mopasaka og kasong graft and corruption ngadto sa buhatan sa Ombudsman gumikan sa nakitang ilegal nga katukoran sa CIOEAI nga migamit sa mga pasilidad sa gobiyerno bisan kini usa ka pribadong grupo apan gi-operate og mga public employees.

Lakip usab sa gikwestyon ni Castro ang giingong paghatag sa mga airline companies salapi sa maong kahugpungan ug dili direkta sa buhatan sa BID. - Bong Soriano (BANAT NEWS)