Rama ngadto sa mga Kapitan: Mag-amping

CEBU, Philippines – Nanawagan si Cebu City Vice Mayor Michael Rama ngadto sa mga barangay kapitan nga nagplanong motuboy og laing kandidato sa Bando Osmeña Pundok Kauswagan (BOPK) pagkamayor ug bise mayor sa sunod tuig nga eleksyon nga magmainampingon.

Lima ka mga barangay kapitan sa dakbayan nagplanong moduso og laing lig-on nga tandem human gawas sa una na nilang gituboy nga sila si Kongresista Raul del Mar ug mayor Tomas Osmeña.

Ang grupo nilang Pit-os barangay captain Nilo Tariman nagtinguha pagduso og laing pares nga magustuhan usab sa pangulo sa BOPK nga mao ang mayor.

Matud pa ni Rama nga kinahanglang hunahunaon sa mga barangay kapitan ang ilang himuong lakang aron dili mabuak ang BOPK.

“Ang ako lang hangyo nila nga tagaan gyud og panglantaw kay kung naghuna-huna sila nga dili mabuak ang grupo ato gyud nga han-ayon ang atong himuon kay anything nga maka-cause og division makapalipay na sa kaatbang,” sumala ni Rama.

Giangkon sa bise mayor nga naapektahan siya sa maong manifesto nga gipirmahan sa 46 ka mga barangay kapitan.

Una nang gipahibawo ni Osmeña nga sila si Rama ug education consultant Joy Augustus Young ang himuong standard bearer sa BOPK sa 2010 elections.

Nasayran nga nangayo na og pasaylo si Rama sa mga barangay kapitan nga iyang gituuhang nasilo kaniya aron paghilot sa mga kahiubos.

Apan matud ni Tariman dili husto ang gibuhat ni Rama pagpangayo og pasaylo tungod kay kini giingong wala makasala kanila.

Gitataw ni Tariman nga ang ilaha lang, dili sila kumbinsido sa management style ni Rama hinungdan nga sila nangita og laing paluyuhan sa umaabot nga piniliay.

Gipadayag hinuon ni Rama nga walay makapugong sa himuon nilang Tariman ug kaubanan apan nidugang ang bise mayor nga angayang hinuktukan niini ang himoong lakang. (Elly Bolonos) (BANAT NEWS)