Kapolisan magpatabang sa mga bangko pagpaniid sa tulisan

CEBU, Philippines - Mga tagdumala sa mga bangko sa dakbayan gipahimangnoang magma-binantayon tungod sa nahitabong pagtulis sa walo ka tulisan niadtong Lunes sa kaadlawon sa Fooda Savers Mart diha barangay Camputhaw.

Si Sr. Supt. Patrocinio Comendador ang hepe sa kapulisan sa dakbayan sa Sugbu mitug-an sa mga tigbalita nga wala nila isalikway ang posibilidad nga moduol ang mga tulisan sa bangko aron ipa-tibuok ang kapin P100 mil nga mga sinsilyong ilang nadala.

Samtang nangayo usab sila karon og panabang sa ubang mga police units sa rehiyon ug ubang lugar sa ingon ilang masubay sa imbestigasyon kun si kinsa ang maong grupo.

Gipadayag niini nga bisan duna nay cartographic sketch ang CCPO sa usa sa mga tulisan apan wala pa gyud silay pangalan sa maong grupo gawas lang nga dili kini taga Sugbu ug gikan sa Mindanao.

Samtang ang kabahin sa tulo ka mga security nga sila si Geofrey Luna, Jessrey Bahinting ug Neil Zoren Bocquecosa gipaabot pa ang resulta sa polygraph kon lie detector test.

Ang kapolisan wala mosalikway nga may inside job nga nahitabo.

Samtang si Chief Supt. Federeco Terte ang acting director sa Police Regional Office (PRO-7) mimando nang ipasulbad ang maong tulis sa CCPO sa labing daling panahon.

Sa laing bahin, si Dr. Nestor Satur ang chief sa PNP Crime Laboratory 7 ang mipahibalong girelibuhan na si PO3 Jorlick Roma ang desk officer sa SOCO-7.

Si Roma ug ang team niini sa mga imbestigador giimbestigahan karon tungod sa kapakyas pagresponde sa alarma diha sa maong tindahan ug ulahi na kaayong miabot. – BANAT NEWS