Mga negosyante wala na mamayad og buhis

CEBU, Philippines - Naapektohan na ang dagan sa buluhisan sa lungsod sa Tudela tungod sa padayong panagbangi sa duha ka mga mayor nga sila si Rogelio Baquerfo ug Demitrio Granada sulod na sa pipila ka mga bulan.

Gumikan sa maong makalilibog nga sitwasyon kun si kinsay tuohan midumili una pagbayad og buluhisan ang mga negosyante sa munisipyo particular na kun si kinsay mopirma sa ilang business permits

Matud pa ni Provincial Treasurer Roy Salubre nga ang mamahandi karon sa lungsod sa Tudela nga si Angelita Roble mitug-an kaniyang nagnihit karon ang panudlanan sa maong lungsod tungod kay nagpanagana ang mga negosyante sa pagkuha og business permit.

Nagkaproblema usab ang collection sa munisipyo tungod sa kakulang sa logistics tungod kay mismong ang mga kawani di maayo ang relasyon sanglit giingong tawo ni Baquerfo ang milingkod nga municipal treasurer.

Pipila ka mga apektadong mga negosyante ang niduol karon sa probinsiya aron matabangan sila sa ilang kalibog.

Kini ang hinungdan nga niinterbiner na usab ang gobernadora sa lalawigan sa Sugbu nga si Governor Gwendolyn Garcia tungod kay ang Land Bank dili na mopagawas og pundo alang sa maong lungsod tungod gihapon sa paglingkod sa duha ka mayor.

Sumala pa ni Salubre nga mimando ang gobernador nga siya maoy motindog isip officer-in charge sa treasury sa Tudela ug karon ilaha pa kining gipananghid ngadto sa Manila, aron mahibalik ang normal nga operation sa municipal treasurer ug siya na ang mamirma sa mga business permits.

Dugang pa ni Salubre, pinaagi niini mopagawas na og balik og pundo ang Land Bank alang sa panginahanglanon sa maong lungsod. - Chester Abadilla (BANAT NEWS)