2 ka traysikad drayber nalumos

CEBU, Philippines - Patay nang nakit-an ang duha ka mga traysikad driver human mangalumos sa dihang nangaligong hubog sa usa ka dam diha sa barangay Basak lungsod sa Badian niadtong Domingo sa alas 5:30 sa hapon.

Ang mga nakit-an naglutaw nga pulos na mga patay mao sila si Rodulfo Agravante, 30, molupyo sa nahisgutang lugar ug Eddie Domecillo, 35, biyudo ug nagpuyo sa sitio Toril, barangay Taytay sakop sa maong lungsod.

Matud pa ni PO1 Arnel Tandoy sa Badian Police Station sa dihang nahinabi sa Banat News ang duha sa sayo pa nakit-ang nag-inom sa pinuy-anan ni Agravante nunot usab sa pagsaulog sa birthday sa usa sa mga igsuon niini.

Apan human sa ilang panag-inom nianang pagkahapon na nanglakaw ang duha og nakadesider mangaligo kini sa river dam tungod kay niadtong tungora taob ang tubig, sumala pa ni Sr. Insp. Rodrigo Orbigoso, hepe sa police station sa maong lungsod.

Ang maong dam gikatahong gipanag-iya sa Cebu Electric Cooperative-3 sa maong dapit.

Wala hinuon ma-establisar sa kapolisan kun si kinsa ang dili makamaong molangoy sa duha apan dako ang ilang pagdudang posibleng mga hubog sila dihang nangaligo sa maong dam gibana-banang kapin sa unom ka tiil ang gilawmon.

Apan dunay report nga may ikatulong kauban ang duha atol sa pagpangaligo ug misuway pa unta og tabang kanila apan gumikan kay ang duha na ang mikapyot kaniya wala na siya'y mahimo kun dili isalbar ang iyang kaugalingon, wala pa matino sa kapolisan ang pangalan sa maong ikatulong tawo.

Usa ka lalaking gikan nanghipos sa iyang mga binuhing mga hayop nga miagi sa maong lugar maoy nakakita sa duha nga pulos na naglutaw sa maong sapa nga wala nay panimuot hinungdan nga gipahibalo dayon ang mga kabanay ug kapolisan.

Sa pagresponde sa mga polis patay na ang duha ug gikonpirmar sa municipal health doctor sa maong lungsod nga pagkalumos maoy gikamatyan niini. - Guam Logroño (BANAT NEWS)