CEBU, Philippines - Gikompirma kagahapon sa presidente sa Mactan Chamber of Commerce, Efren Pelaez Jr. ang iyang pagkandidato pagka- Mayor sa dakbayan sa Lapulapu batok sa itugpo pagka-mayor ni Mayor Arturo Radaza karong umaabot nga eleksiyon sa 2010.
Gibutyag kini ni Pelaez human sa gipahigayong 888 Forum kagahapon sa buntag didto sa Waterfront Hotel, Lahug, dakbayan sa Sugbo kinsa mikonpirmar ngadto sa mga tigbalita nga hapit na makompleto ang iyang line-up ubos sa tiket sa opposition.
Gitino ni Pelaez nga maglayag siya sa kadaugan tungod kay nakabintaha siya kay ang mga negosyante sa maong lugar naa mopabor kaniya.
Gani may mga negosyante nang mitanyag og suportang pinansyal kaniya aron gamiton sa kampanya niya sa umaabot nga election.
Gibutyag usab ni Pelaez nga ang ilang pili-on nga moapil sa iyang tiket mao kadtong mga tawo nga oposisyon gyung tinuod nga wala kauyon sa binuhatan ni Radaza .
Ang bugtong tinguha ni Pelaez mao nga kahatagan og kapilian ang taga Lapulapu kun kinsay ilang pilion tali kaniya nga naggukod sa mga binuang o kaha ang tawo ni Radaza nga may kalagmitan nga motabon ra sa mga hiwi nga binuhatan.
Si Pelaez midugang nga ang ilang plata porma mao ang “good governance and pro business.” - Brenda D. Batuto (BANAT NEWS)