Mga abogado sa Crame moabag batok Jastiva

CEBU, Philippines -   Ang director sa Cebu City Police Office Sr. Supt. Patrocinio Comendador mihangop sa lakang ni acting Police Regional Office (PRO-7) Chief Supt. Federico Terte sa pag-abag sa CCPO sa paghatag og banggiitang mga abogado.

Kini maoy gipadayag ni Comendador atol sa iyang pag-atubang sa mga sakop sa media human gipahibalo ni Chief Supt. Terte nga hatagan niya og maayong abogado ang CCPO nga makatabang sa ilang pag-prosecute sa kasong parricide batok kang Pastor Leonardo Jastiva Sr., presidente sa International Missionary Society of Seventh Day Adventist Reform Movement kinsa maoy gitumbok nga mipatay sa iyang asawang si Judith Jastiva.

Matud pa ni Comendador nga iyang gihangop ang lakang ni Chief Supt. Terte gumikan kay tinuod usab nga nagkinahanglan gyud ang CCPO og mga bangiitang abogado, ilabina nga sa mga maayong abogado nga gikan sa ulohang buhatan sa PNP sa Camp Crame.

Gibutyag ni Comendador nga matag karon ug unya mohatag siya’g update kang Terte labot sa kaso ni Pastor Jastiva sa ilang panagtagbo.

Una niini si Comendador mipahibalo nga mokuha sila sa serbisyo sa mga pribadong abogado sa pagpadayon nila sa kaso batok kang Pastor Jastiva ug dili lang magsalig sa ihatag sa PRO-7.

Si Terte mipahibalo nga ang mga ngilngig nilang abogado gikan sa Camp Crame maoy ilang kuhaon sa PRO-7 aron maoy moabag sa CCPO sa pagpadayon sa ilang pagpalig-on sa kaso.

Gipasabot ni Terte nga gikinahanglan kaayo ang tabang sa ilang mga maayong abogado gikan sa Camp Crame, labi na sa maong kaso nga maglisod na unya ang CCPO.

Nakita niini ang kakulangan gyud sa mga abogado sa CCPO ilabi na niadtong nakagawas si Jastiva human gipaboran ang writ of habeas corpus nga giduso sa mga abogado sa Pastor diin ang kapolisan sa dakbayan naningkamot gyud sa pagpanguha og igong mga ebidensya.

Samtang subay niini, si Comendador mipadayag nga iyang gihangop ang gipadayag ni Pastor Jastiva nga atubangon niini ang kasong parricide nga ilang gipasaka ug dili gyud mobiya dinhi sa nasud.

Matud pa ni Comendador nga mas maayo nga mipadayag niini si Pastor Jastiva apan dili kini makapahunong nila sa pagkuha unya og hold departure order sa pagpa-blacklist sa pangalan niini sa Bureau of Immigration and Deportation (BID).   (BANAT NEWS)