CEBU, Philippines – Usa ang patay ug laing duha ang naangol sa dihang aksidenting nakaligis og lalaki ang usa ka motorsiklo didto sa eskina sa Sitio San Isidro, barangay Perrelos, siyudad sa Carcar niadtong Domingo sa alas 12:15 sa udto.
Ang gideklarar nga dead on arrival paghiabot sa Carcar City District Hospital mao si Renario Lauron, 58, minyo ug molupyo ra usab sa nahisgutang lugar.
Samtang ang drayber sa motorsiklo nga nakadasmag sa biktima mao si Carmelo Osmil, 46, minyo ug molupyo sa Sitio Pungsod, barangay Lawaan-III, siyudad sa Talisay ug dunay angkas nga si Rey Gabrines, hingkod ang panuigon.
Matud ni SPO1 Joseph Quimod, traffic investigator sa kapolisan sa siyudad sa Carcar ang motorsiklo nga gimaneho ni Osmil gikan kini sa habagatan nga bahin ug paingon nang mopauli sa siyudad sa Talisay apan paghiabot sa nahisgutang lugar sa eskina nga bahin kalit lang milabang ang biktima.
Maayong pagkalabay og pipila ka metros sa biktima una pa malamba sa karsada ug pagkatumba sa motor ug nangalabay ang mga sakay niini.
Daling gipanghatod sa Carcar District Hospital ang mga biktima apan si Lauron maoy gideklarar nga patay nang nahidangat tungod sa seryosong kadaot nga naangkon sa ulo niini epekto sa pagkalamba niini sa semento nga karsada.
Samtang ang drayber sa motorsiklo ug ang angkas niini nahilandig sab sa tambalanan tungod sa mga samad ug pangos nga ilang naangkon. (Darrel A. Carumba) (BANAT NEWS)