Tulay gipangawat ang bolt

CEBU, Philippines - Higpit nga gibantayan ang bag-ong tulay sa barangay Campo 4, dakbayan sa Talisay tungod kay gikatahong gianam na og kawat ang mga dapat niini nga naghatag og peligro sa mga moagi.

Ang maong tulay natukod mga walo na ka tuig   ang milabay nga ubos sa paningkamot ni kanhi Kongresista Jose “Dodong” Gullas.

Ang maong tulay maoy nagsumpay sa barangay Jaclupan ug Campo 4 diin anha usab moagi ang taga barangay Manipis, unahang barangay sa Campo 4.

Giilis kini sa usa ka karaang taytayan sa maong lugar nga natukod pa sa panahon sa ikaduhang gubat sa kalibotan.

Si Superintendent Henry Binas, hepe sa kapolisan sa dakbayan sa Talisay mibutyag sa Banat News  nga bag-o lang siyang nakadawat og taho kabahin sa giingong gihimulbolan ang maong tulay sa mga bolt ug ubang dapat niini.

Gani si Leonard Remegio, konsehal sa maong barangay mibutyag usab sa Banat News nga bag-o lang nilang nabantayan nga ang piraso sa puthaw ug bolt sa top beam sa tulay, nawagtang na apan wala nila masakpi ang nagkuha niini ug ang maong hitabo gipahibawo na nila ngadto sa Department of Public Work and Highways (DPWH). – BANAT NEWS