Tiya gipusposan sa pag-umangkon patay

CEBU, Philippines - Kasong homicide ang gipasaka sa kapolisan sa lungsod sa Aloguinsan batok sa usa ka pag-umangkon kinsa miunay og patay sa iyang iyaan pinaagi sa pagbunal og kahoy sa ulo niadtong niaging adlaw didto sa Sitio Tabay Katikyano, barangay Punay.

Ang biktima mao si Maribel Laoglaog, 40, biyuda, taga Punay , samtang ang suspetsado mao ra usab ang iyang pag-umangkon nga si Roel Laoglaog, 22, silingan ra sa biktima.

Si PO2 Eugene Taboada sa Aloguinsan Police Station mibutyag sa Banat News nga sa wala pa ang hitabo, ang biktima kinsa bag-o pang miabot gikan sa Manila, nagpakuyog sa suspek ngadto sa iyang balay.

Apan samtang nanglakaw ang duha, giingong nagkalalis kini sa dalan sa wala matinong hinungdan.

Sa pag-abot nila sa sitio Tabay Katikyano, ang suspetsado kinsa nagpangusmo na sa kalagot,   kalit lang mipunit og usa ka sanga sa kahoy nga kaymito ug mao kini gipuspos sa ulo sa biktima sa makagdahang higayon nga maoy hinungdan sa hinanali niining kamatayon.

Human sa maong krimen ang suspetsado bulontaryong mi-surrender ngadto kang Kapitan Julio Lapera sa ilang lugar kinsa mao na usay mi-turn-over sa suspetsado ngadto sa kapolisan

Nasayran usab gikan sa kapolisan nga ang suspetsado may pagdumot nang daan sa biktima unya dihang giligid kini’g kasaba sa dalan, wala na makaantos, hinungdan nga iyang gipatay ang naulahi.  - Guam P. Logroño (BANAT NEWS)