CEBU, Philippines - Patay ang usa ka tawong gidudahang may kakulian sa pangisip nangilog og armas sa usa ka polis sulod sa Mandaue City Police Office (MCPO) headquarters kagahapon sa buntag.
Si Insp. George Aniñon, hepe sa homicide section nga nahinabi sa Banat News miila sa napusilan mao si Renato Galo Ollave, 41, lumad nga taga barangay Canading dakbayan sa Ormoc.
Matud pa ni Aniñon giilugan ni Ollave og .45 kalibreng armas si PO1 Marvin Candido kinsa giingong gipangutan-an ni Ollave asa makakuha og passes sa barko aron siya makauli sa Ormoc.
Gikatahong daan nang kadudahan ang linihukan niini ug nagpunay og sulod-gawas sa kampo hinungdan nga giduol kini ni PO1 Candido ug gipangutana, apan human tubagang sa DSWD kini makapangayo niini nasuko kini ug kalit nga giilog ang armas diha sa holster sa maong polis.
Dihang nakuha sa suspek ang armas mikaratel nalang og dagan si Candido ug giingong gisuwayan pagpusil ni Ollave sila si SPO4 Mario Retuya, SPO4 Arnulfo Quiatchon ug uban pa nga diha niadtong higayona apan wa makabuto ang armas.
Matud pa ni MCPO director Orlando Ualat, tuyo unta nilang i-neutralize si Ollave apan dihang gikasa niini ang armas napugos sila si PO2 Sialas Llanado ug PO3 Leonilo Valiente pagpusil kaniya.
Ang duha ka polis gikatakdang ipailawom sa paraffin test ug posibleng lakip na si Ollave. - Romeo Limpangog uban sa report ni Bong Soriano (BANAT NEWS)