28-anyos gipusil sa iyang kaduwa

CEBU, Philippines - Patay ang usa ka lalaki human kini gipusil makadaghan sa iyang kaduwa sa basketball sa miaging adlaw pasado alas 3 sa hapon sa sitio Camarin, barangay Vito lungsod sa Minglanilla.

Si Mario Abasolo, 28, residente sa nahisgutang lugar napusilan sa usa ka Alex Montellano Jr. silingan sa biktima.

Matud pa ni SPO4 Remejio Elacion nga ang biktima ug ang suspek parehong nagduwa og basketball sa nahisgutang lugar.

Ang grupo sa biktima ug ang grupo sa suspetsado nagkalalis sa wala masutang rason ug tunga-tunga sa panaglalis wala nakaagwanta ang suspek ug daling miuli sa ilang panimalay.

Matud pa ni PO1 Humprey Alpas dihang nahinabi sa Banat News  kauban sa biktima ang iyang igsuong si Warren Abasolo, ug ig-agaw nga naila lang sa pangalan nga Giovanie nga nagduwa og basketball.

Dihang nahitabo ang panaglalis ug milakaw ang suspek dali usab nga namauli ang igsuon ug ig-agaw sa biktima.

Sa pagbalik niini aduna na kini gidala nga wala matinong kalibre sa armas dayong pusil sa biktima makadaghang higayon.

Matud pa ni Elacion nakabantay unta ang biktima nga may gidalang armas ang suspek maong dali kining mipahibalo sa iyang mga kaubanan sa pag-ingon “dagan mo kay nagda og armas,” hinungdan sa ilang pagdinaganay palayo.

Apan ang biktima nga wala makadagan giduol sa suspetsado dayon giingnan og “apil ka” ug gidiretso pagpusil makatulo sa ulo ug sa likod nga bahin sa iyang lawas.

Ang suspetsado daling miikyas palayo sa lugar samtang ang biktima daling gidala sa Minglanilla District Hospital apan gideklarar kini nga dead on arrival. (Lesley Caminade ug Darrel Carumba)   (BANAT NEWS)