Roderos adto na sa Crame

CEBU, Philippines - Mobiya na karong adlawa si Chief Supt. Ronald Roderos isip pangulo sa Police Regional Office (PRO-7) kini aron sa paghupot og laing posisyon didto sa Camp Crame.

Ang turnover of command ipahigayon karong alas 10 sa buntag diha sa Police Regional Office Headquarter diin si Roderos, hulipan sa iyang Deputy Regional Director for Administration nga si Chief Supt. Federico Terte.

Ang maong kalihukan pangulohan mismo ni PNP chief Jesus Versosa Jr. ug Secretary Ronaldo Puno sa Department of Interior and Local Government (DILG).

Si Roderos adto na kini sa Camp Crame aron usab iyang makuha ang 2 star general ug siya na maoy bag-ong gitudlo ni Presidenti Gloria Macapagal Arroyo nga Director for Research and Development, ang kanhi posisyon nga gihuptan sa iyang kaluha nga si Chief Supt. Ray Roderos, kinsa anhi na usab dinhi sa PRO-7 isip bag-ong chief sa Directorate for Integrated Police Operations (DIPO).

Si Roderos una nang mipadayag niadtong mga nangaging mga adlaw nga gusto gyud unta siya nga anhi na lang sa PRO-7 magpabiling hepe sa dili pa mo-retiro sa sunod tuig.

Apan wala siya’y mahimo human usab si Presidenti Arroyo miduso og direktiba alang na sa iyang pagdestino sa Camp Crame ug makuha niini ang iyang 2 star general sama sa iyang kaluha.

Hinuon nagpasalamat na siyang daan sa mga lokal nga opisyal dinhi sa rehiyon ug sa Sugbu gumikan sa suporta sa iyang liderato sa PRO-7 nga ubay-ubay nga mga national awards ang ilang nadawat.  - Guam P. Logroño (BANAT NEWS)