CEBU, Philippines - Dako ang posibilidad nga dili na mopasaka og kaso ang pamilyang Burden batok sa pipila ka sakop sa Cebu City Tourism Commission (CCTC) kun makigsabot-sabot kanila ang kagamhanan sa dakbayan sa Sugbu alang sa paghilot sa nabulilyasong pagpahigayon sa Miss Cebu 2009.
Nakontrobersiya ang nahisgutang beauty pageant tungod sa paghatag og sayop nga mananaog sa texters choice award pinaagi sa Globe Telecom.
Sa nasayran, si Kimberly Therese Burden maoy “winner” sa maong special award apan kini didto gihatag kang Kris Tiffany Janson ang nakoronahang Miss Cebu 2009 butang nga dili madawat sa pamilyang Burden ilabi na ni Kimberly ug sa inahan niini nga si Dr. Rowena Burden hinungdan nga sila miprotesta.
Duna hinuoy pormal nga imbestigasyon nga gihimo ang CCTC apan ang resulta niini dili usab madawat sa pamilyang Burden.
Kini ang hinungdan nga ang mga Burden mipadayag pagpasaka og kaso batok sa mga organizer sa Miss Cebu 2009.
Gitataw hinuon ni Dr. Burden nga sila makigsabot-sabot lang kung si City Administrator Francisco Fernandez maoy muduol kanila.
Duna hinuoy usa ka kondisyon nga gipangayo ang doktora kini mao ang pagpapahawa nilang CCTC marketing consultant Bruce Bollozos ug Miss Cebu project chairperson Philip Rodriguez.
Nagtuo si Dr. Burden nga magpabilin ang pagduda sa mga tawo labot sa kridibilidad sa nahisgutang beauty pageant kun magpabilin ang maong mga personalidad sa CCTC. -Elly Bolonos (BANAT NEWS)