Resignation ni Kim Burden wa pa desisyoni sa CCTC

CEBU, Philippines - Wala pa gihapon makadesisyon ang Cebu City Tourism Commission (CCTC) kung dawaton ba niini ang resignation letter ni Kimberly Therese Burden.

Kini subay usab sa buluntaryong pagluwat ni Burden isip Miss Cebu 2009 second runnerup pipila ka semana na ang nakalabay.

Matud ni CCTC acting chairman, acting vice Mayor Hilario Davide III, nga karon pang sunod semana nila tukion ang resignation letter ni Burden.

Kini atol sa sinimanang tigom sa CCTC nga gipaabot usab nga tambungan sa mayuriya kun dili man sa tanang mga commissioner niini.

Hinuon gipadayag nang daan ni Davide nga dako ang kahigayonan nga ilang dawaton ang resignation ni Burden tungod kay kini giingong irrevocable.

“Irrevocable man gud tong iyang resignation, so, dako ug chance nga dawaton sa commission ang iyang gipadala nga suwat,” sumala ni Davide.

Gipasalig ni Davide nga ilang padalhan og tubag si Burden sa resignation letter niini human sa ilang tigom aron kini masayod usab sa ilang baruganan.

Miluwat si Burden isip 2nd runnerup sa Miss Cebu 2009 agig pagprotesta sa nitumaw nga texters choice award controversy atol sa coronation night.

Kini tungod kay laing kandidata ang gihatagan sa nahisgutang special award ug dili ang tinuod nga nidaug niini nga si Burden.

Lakip nga gitalikdan ni Burden sa iyang gihimo nga lakang mao ang iya untang madawat nga mga premyo nga naglakip sa cash prize nga P20 mil.

Dugang niini mao ang trip ngadto sa Hongkong, waterbed, ug ubay-ubay nga mga gift certificate gikan sa nagkadaiyang sponsors.

Una na hinuong gipadayag ni Burden nga siya wala mahangol niini ug ang iyang gusto nga makuha mao ang hustisya sa pagpakauwaw nga gihimo sa mga organizer kaniya.

Nasayran nga si Burden uban sa iyang pamilya gitakdang mupasaka og kaso batok sa mga organizer sa Miss Cebu 2009.

Wala matagbaw ang mga Burden sa resulta sa gihimong imbistigasyon sa CCTC tungod kay usa lang ka tawo ang giduot niini nga sad-an sa kontrobersiya.

Gawas kang CCTC marketing consultant Bruce Bollozos, ilakip usab pagkiha sa mga Burden ang project chairperson sa Miss Cebu 2009 nga si Philip Rodriguez.

Naglaraw usab ang mga Burden paglakip kang acting Mayor Michael Rama sa kaso isip chairman sa CCTC nga maoy nagmugna sa nahisgutang beauty pageant. - Elly Bolonos  (BANAT NEWS)