Kabalayan sa Sitio Naba demolison

CEBU, Philippines -  Panggub-on na ang mga panimalay diha sa sitio Naba sa barangay Mambaling sa siyudad sa Sugbu nga wala maapil sa pagkasunog niadtong miaging Enero 31.

Kini maoy gipahibawo ni Konsehal Gerardo Carillo, ang chairman sa Cebu City Disaster Coordinating Council (CCDCC).

Tumong sa kagamhanan sa dakbayan nga usbon sa kinatibuk-an ang dapit nga nasunugan pinaagi sa re-blocking.

Matud ni Carillo nga mukapin sa napulo ka panimalay sa sitio Naba nga wala malakip pagkaugdaw sa sunog ang panggub-on sa mosunod nga mga adlaw.

Giklaro hinuon sa konsehal nga ang maapektahan sa demolisyon hatagan usab og relocation sa siyudad sama sa mga nabiktima sa sunog.

“We need to clear it out because the moment nga dunay laing sunog nga motumaw diha, mao lang gihapon ang mahitabo unya,” sumala ni Carillo.

Nagkanayon ang konsehal nga pinaagi sa re-blocking mahimoan na unya og mga karsada ang maong dapit ingon man drainage system.

Gipasalig hinuon ni Carillo nga kadtong mga residente kansang pwesto maigo sa himuong karsada hatagan gihapon og luna diha sa maong dapit nga katukuran og pinuy-anan.

Matud sa konsehal nga nahuman na ang gihimong plano sa re-blocking ug kini posibleng mapatuman sa hinapos nga bahin niining semanaha o sa sayong bahin sunod semana.

Gipadayag ni Carillo nga abunohan usab sa City government ang nalupa nga bahin sa sitio Naba ilabi na sa dapit habig sa South Road Properties (SRP).

Gitataw sa konsehal nga dili nila pabalikon ang mga nabiktima sa sunog diha sa lugar nga nasunugan hangtud nga mahuman ang re-blocking. - Elly Bolonos (BANAT NEWS)