Cebu - Gipahunong ni Mayor Socrates Fernandez ang gitrabahong dog pound sulod sa compound sa ihawan sa siyudad sa Talisay sa barangay Pook tungod sa mga reklamong baho nga hangin gikan niini.
Si Konsehal Aaron Capala kinsa chairman sa slaughterhouse sa pakighinabi niini sa mga tigbalita nagkanayon nga wala siya’y kalibutan kabahin sa nahisgutang edipisyo nga gitukod ug dili kini angayan nga ibutang diha sa lugar.
Ang mga residente diha sa duol sa ihawan mireklamo tungod kay ang mga iro nga nadakpan giingong gipangpuspusan lang ug wala iagi sa gas chamber apan wala usab ipanglubong dayon maong nangabaho.
Si Capala nabalaka sa migawas nga mga report nga dunay mga irong gipang-ihaw sa maong edipisyo ug posibleng makatagak unya kanila gikan sa “AA” accreditation.
Si Dr. Galileo Larawan, city veterinarian sa siyudad mibutyag sa Banat News kagahapon nga ang nahisgutang edipisyo aprobado sa siyudad ug nasugdan na kini sa pag-construct niadtong Disyembre sa milabay’ng tuig ug 60 porsiyento pa lang ang nahuman niini.
Apan tungod sa mga isyu niadtong Enero 21, 2009 si Mayor Socrates Fernandez ang miluwat og memorandum sa pagpahunong sa pagtrabaho sa maong edipisyo.
Gihimakak ni Larawan ang taho nga ang mga iro sa dog pound pamuspusan ra aron mamatay, matud niya duna silay gas chamber nga maoy patyan sa iro pinasubay kini sa Akta Republika 8485 kon Animal Welfare Act, apan ning bag-uhay lang naguba kini ug wala pa magamit.
Tungod niini gihunong una nila ang pagpanakop sa mga libud-suroy nga iro ug iring.Napulo ngadto sa 20 ka irong libud-suroy ang madakpan matag adlaw. - BANAT NEWS