Estudyante nalasikan sa bala

Cebu - Usa ka estudyante nasamdan dihang nalasikan kini sa mituasik nga bala sa armas sa iyang higala didto sa sitio Mansinitas, B, Rodriguez, barangay Sambag, Cebu City sa miaging hapon.

Ang biktima nailhan nga si Rhen Lewis Estera Uy, 19, taga Mansinitas, samtang ang tag-iya sa .38 kalibreng revolver kansang bala nakasamad sa biktima mao si Jose Mike Mendoza, hingkod nga trabahante sa bakery.

Sa wala pa ang hitabo, gidiskargahan ni Mendoza og bala ang iyang armas kay iyang ipabaligya sa biktima.

Apan human mahuho ang mga bala gisuwayan og kablit ni Mendoza ang gatilyo niini paatubang sa bongbong sa usa ka balay dihang kalit lamang kining mibuto.

Nanuasik ang tingga nga bala nga maoy nakaigo sa dughan, tiyan ug kamot sa biktima.

Gidala dayon sa Vicente Sotto Memorial Medical Center ang biktima samtang ang tag-iya sa armas nga si Mendoza nagtingkagol na sa prisohan. - Lesley Caminade (BANAT NEWS)