2 ka sitio sa M'baling gibutang sa state of calamity sa brgy.

Cebu - Gideklarar na sa konseho sa barangay Mambaling nga ubos sa state of calamity ang duha ka sitio (Naba ug Puntod) niini nga naigo sa sunog niadtong miaging adlaw.

Mukapin sa 200 ka pamilya ang nabiktima sa nahisgutang sunog nga temporaryo karong gipahimutang sa sitio Viking sports complex.

Kagahapong adlawa, gitigom ni barangay kapitan Rodolfo Estella ang mga sakop sa ilang konseho ug gipaubos sa state of calamity ang dapit nga nasunugan.

“Among gidiklarar og calamity area kay aron makapagawas dayon ta sa atong calamity fund,” nagkanayon si Estella.

Ang barangay Mambaling dunay P400 mil nga calamity fund niining tuiga, apan P150 mil lang ang ilang gigahin alang sa mga fire victim.

Sumala ni Estella nga ang nahisgutang kantidad ilang ipamalit unya og pagkaon ug ihatag usab ngadto sa mga nasunugan.

“Kay ang ihatag nga pack lunch sa City government good for three days ra man, so, kami nay muhatag unya human sa siyudad,” dugang ni Estella.

Karong adlawa gitakda usab nga ipalabang ni Konsehal Gerry Carillo ang resolusyon nga magdeklarar sa duha ka sitio nga ubos sa state of calamity atol sa ilang special session.

Kini aron mapagawas usab dayon ang tipik sa calamity fund sa dakbayan pagpalit sa nag-unang mga panginahanglan sa mga fire victim.

Ang konsehal nga mao usab ang chairman sa Cebu City Disaster Coordinating Council nipasalig nga ila unyang pabawnan ang mga nasunugan.

“Manghatag ta og tents, mga kitchen utensils, pagkaon nila good for two weeks ug pipila ka housing materials sama sa sin ug plywood ug uban pa,” matud ni Carillo.

Sa pagsuwat ning balita nagpadayon pa ang mga sakop sa Department of Social Welfare and Services (DSWS) paglista sa mga biktima.

Matud ni Minda del Monte sa DSWS nga ila usab nga gi-verify ang ilang listahan aron ang mahatagan og hinabang kadto lang tinuuray nga nasunugan. - Elly Bolonos (BANAT NEWS)